Ipinupursige kan Department of Agriculture (DA) an pagpapalawig kan industriya nin palm oil sa Pilipinas tanganing mabawasan an haros 90% na pagdepende sa importasyon.
Apwera sa pagkakan, katuyuhan man kaini na makapagtao nin lokal na materyales para sa mas malinig na klase nin fuel.
Sa ginibong budget hearing sa Kamara,tinawan -doon ni DA Secretary Francisco P. Tiu Laurel Jr. na sarong marhay na oportunidad ini para sa mga paraoma asin lokal na negosyante huli sa halangkaw na demand sa merkado.
Hinagad kan DA an inisyal na P300 milyon na pondo para sa 2027 development budget kan palm oil, mantang ipinapanukala man an sagkod P1 bilyon na taonan na alokasyon sa laog nin limang taon kun maipasa an nakatalaan na ley para sa sektor.
Sa irarom kan roadmap kan gobyerno, target kaini na idevelop an 300,000 na ektarya nin palm oil plantations sa nasyon, kun sain an maabot an 100,000 ektarya bago matapos an 2028 maikukunsiderar nang dakulang lakdang.
Tanganing mas marikas na maipautob an mga programa, suhestyon kan DA an pagbugtak nin suway na Deputy Administrator asin dedikadong team sa Philippine Coconut Authority (PCA) na matutok sa palm oil.
Suportado man kan mga kawani an pagpapatibay sa panukalang Palm Oil Bill, kun sain nakatala sindang magsumite nin opisyal na rekomendasyon ki Presidente Ferdinand R. Marcos Jr. tanganing ideklara ini bilang urgent bill.
