Aram baya nindo mga ka-bombo, liwat nakaibahan kan sarong pamilya gikan sa North Carolina an saindang nawawarang ido na bigla na sanang nawara sa saindang harong tolong taon na an nakakalihis.
Susog sa report kan Rocky Mount Police Department sa saindang social media page, nahiling soboot ni Jonathan Shearin asin kan saiyang agom an ataman na Ido sa Rocky Mount’s Petfinder page.
Sigun sa pamilya Shearin, an Ido na igwang pangaran na Kaz an nawara tolong taon na an nakakalihis sa saindang harong sa Louisburg haros 35 milya an rayo gikan sa Rocky Mount.
Pigsaysay man ni Derek Barnhill, an animal control supervisor kan siyudad na bibihira sana soboot an reunion na siring kaining kahaloy na panahon.
Mientrastanto, pigpaliwanag man kan opisyal na huli ta gikan sa lahing husky si Kaz na bistado sa saindang pagiging matalino, halangkaw na energy level asin independent nature kaya dae imposible na mawara an Ido tolong taon na an nakakalihis.
Pigtawan duon man kan Rocky Mount Police Department na dae nag-untok an pamilya Shearins hasta dae mahanap an saindang pigpapadangat na Ido.
Sa ngunyan, magayon soboot na pagirumdom an siring na pangyayari na kaipuhan gibuhon an gabos para sa mga pigpapadangat sa buhay mapa-hayop o tawo man.
