Aram baya nindo mga ka-bombo, makalihis na mahailing kan sarong Russian photographer sa Bangkok an sarong joven na street sweeper an nagin overnight sensation sa saiyang nasyon asin nakakua nin manlaen-laen na modelling gigs sa mga bistadong brands.
An istorya ni Noppajit “Meen” Somboonsate an garo sa pelikula na igwang tema na rags-to-riches story.
Nagpuon an kakaibang eksperyensiya ni Meen kan nakalihis na bulan kun saen an 28-anyos na single na Ina asin igwang duwang aki an napansin kan sarong Russian photographer na si Semyon Rezchikov sa Bangkok, Thailand.
Kan oras na idto, naglilinig sa tinampo si Meen asin dae soboot napansin si Semyon na labing nangalas sa saiyang kagayunan na nagresulta tanganing kuanan ini nin ladawan.
Makalihis ini, pigranihan kan photographer si Meen asin ipinahiling an kinuang ladawan asin pig-omaw an saiyang kagayunan. Ipinost ni Semyon an ladawan ni Meen sa saiyang TikTok account na tolos man nagin viral.
Labing nangalas asin naintriga an mga tawo sa kagayunan ni Meen asin mawot kan mga ini na mas mabistado pa an nasambitan ng babae.
An encounter ni Meen sa nasambitan ng photographer an nagdara nin magayon na pagbabago sa saiyang buhay na nagdara man nin inspirasyon sa publiko.
Sa ngunyan, nagpasalamat na sana si Meen sa gabos na nagin instrumento tanganing makabuhat ini sa buhay asin makapagtao nin marhay na futuro para sa saiyang mga aki.
