NAGA CITY- Isasagibo an filing kan mga mawot na mag-exam sa Civil Service Commission sa paaabuton na Mayo 13 hasta sa ika-duwang semana kan bulan nin Hunyo para sa ikukundusir na eksaminasyon sa Agosto.
Sa entrevista kan Bombo Radyo Naga ki Ma. Dolores Detera Salud, Director II kan Civil Service Commission, sinaysay kaini na kaipuhan muna mag submit nin online application kan mga ma-exam antes an filing sa sarong mall sa siyudad nin Naga.
Sigun ki Salud, an siisay man na mga Pilipino na edad 18-anyos an pwedeng mag-exam para sa Civil Service Commission tanganing makakua nin elegibility.
Kaipuhan sanang darahon an xerox copy kan ID, picture siringman an pig fill upan online asin magbayad nin P500.
Katakod kaini, an Civil Service Commission (CSC) an ma-grant nin hasta 10 bonus points sa Civil Service Exam (CSE) para sa qualified military asin uniformed personnel (MUP).
Puon 10 August 2025, enkaso mag-take nin CSE asin igwang score sa pag-ultanan kan 70.00 asin 79.99, an pwedeng mag- qualify para sa eligibility sa tabang kan nasambitan ng dugang na puntos.
Sa ngunyan, pig-enkaminar na sana kan opisyal an publiko na purbaran mag-exam tanganing makakua nin eligibility na magagamit sa trabaho asin sa marhay na dokumentos kan sarong indibidwal.
