Uminabot na sa tinatayang ₱6.54 bilyon an danyos na idinulot kan El Niño sa sektor nin agrikultura sa haros sampulong rehiyon sa Pilipinas, base sa pinakahuring datos kan National Disaster Risk Reduction and Management Council (NDRRMC).
Apektado man kan grabeng tagtuyot an 109 na syudad asin munisipalidad na nagdeklara nin state of calamity.
An Cagayan Valley o Region 2 an nagrekord kan pinakadakulang danyos sa agrikultura na nagkakantidad nin ₱4.96 bilyon. Sinundan ini kan Cordillera Administrative Region (CAR) na may ₱934.9 milyon; Davao Region na may ₱410.1 milyon; Zamboanga Peninsula na may ₱95.8 milyon; asin Bicol Region na may ₱37.48 milyon.
Sa 109 na munisipalidad na nagdeklara nin state of calamity, 66 an hale sa Cagayan Valley, 23 sa Caraga, asin 12 sa Bicol Region.
Segun pa sa NDRRMC, uminabot sa 241,664.65 ektarya an kabilugan kan mga pananom na naapektaran kan El Niño. Sa bilang na ini, 51,594.93 ektarya an tuluyang naraot, mantang 188,507.02 ektarya man an bahagyang napinsala.
Kasabay kaini, uminabot sa 215,386 na paraoma asin parasira an naapektuhan kan nasabing kalamidad.
Padagos na namamatean kan sektor nin agrikultura an epekto kan El Niño, na nagdadara nin dakulang pagkalugi sa kabuhayan kan mga paraoma asin parasira sa manlaen-laen na parte kan nasyon.
