Itinaas na kan Philippine Institute of Volcanology and Seimology(Phivolcs) sa Alert Level 1 an bulkang Bulusan, kasunod man kan nangyaring phreatic eruption kansubagong aga (April 28).
Basado sa iniluwas na Alert Level Bulletin kan Phivolcs, gikan sa dating Alert Level 0 ay ini-angat na an alerto huli man sa nagpapadagos na ‘low-level of unrest’ sa nasambitan ng bulkan mantang nagtitinir man an posibilidad na liwat ining magkakakaigwa nin mga serye nin phreatic aruptions.
Kasabay kaini ay pig abisuhan kan Phivolcs an mga lokal na gobyerno harani sa lugar na bantayan an sitwasyon asin tulos na maggibo nin akmang lakdang, kaiba an tulos na pagluluwas nin akmang mga advisory.
Kaipuhan man na istriktong ipautob an pagbabawal na maglaog sa 4-kilometer radius Permanent Danger Zone(PDZ) asin mabantayan an 2-kilometer Extended Danger Zone(EDZ) orog na sa southeast sector.
Ini an huli man sa posibilidad kan pagbagsak nin mga volcanic hazard siring kan pyroclastic density currents(PDZ), ballistic projectiles, mga huma, asin iba pa.
Pig patanidan man an mga komunidad na gumamit nin face mask, orog na sa mga lugar na naka eksperyensya nin magabat na aso na gikan sa nasambitan ng bulkan.
Dae man pighahali kan Phivolcs an posibilidad kan pag-agos kan lahar asin iba pang volcanic materials, orog na kun may magabat na pag-uran o kun masusundan pa an naenot na phreatic eruption kan nasambitang bulkan.
Sa presente, igwa nang nairehistrong ashfall sa kadakol na lugar siring kan mga barangay sa Juban, Sorsogon.
