Pigdepensaran ni US President Donald Trump an saiyang plano na mag-ako nin luxury Boeing aircraft komo regalo gikan sa royal family sa Qatar tanganing ribayan an presenteng Air Force One.
An Boeing 747-8 jumbo jet pig-apod komo flying palace huli ta ini na an pinakamahal na regalo na nareseber kan US government.
Sigun sa mga kritiko an pag-akseptar kan nasambitan ng regalo an posibleng magbayolar kan striktong panundon asin magigin kawsa sa mas orog pang problema.
Marurumduman, pigpaplanuhan ni Trump na magbisita sa Saudi Arabia, Qatar asin United Arab Emirates puon ngunyan na Martes hasta sa aldaw nin Huwebes.
Sa social media post ni Trump, pigsaysay kaini na an jet an temporaryong regalo sana na mapasiring sa Defense Department.
Mientrastanto, para man sa Democratic National Committee na an lakdang na ini ni Trump an nagpapahiling na saiyang piggagamit an presidential office para sa personal na pagkamal nin salapi.
Sa ngunyan, manlaen-laen na reaksyon an padagos na nagbubutwa kasabay kan kaplanuhan na ini kan Presidente kan US.
