NAGA CITY – Matrayumpo asin matuninong na pigkundusir an kakatapos pa sanang 2025 Local and National Election sa Bicol Region.
Sigun sa Philippine National Police (PNP)-Bicol, nagin marhay an daloy kan pirilian, salbado asin matuninong.
Katakod kaini, nagdeploy an PNP Bicol nin maximum personnel sa manlaen-laen na parte kan rehiyon tanganing masierto an mahigot na police presence.
Mientrastanto, sa ibong kan matrayumpong eleksyon, nairehistro man an pirang isolated incidents.
Kabali na digdi an apat na vote-buying sa probinsya kan Camarines Sur na hasta sa ngunyan nagpapadagos pa an imbestigasyon.
Apwera pa digdi, nairehistro man an duwang election-related incidents sa Masbate asin Camarines Norte.
Pag-abot man sa election gun ban, nakapagkurit an ahensya nin 67 na nagbayolar na nagresulta sa pagkakaarestar kan 71 indibidwal asin 78 firearms an nakumpiskar.
Dugang pa digdi, nasa kabilogang 26,482 na checkpoints an pigsagibo.
Sa ibong na lado, nagpasalamat man an PNP Bicol sa gabos nindang nakatuwang na ahensya, Local Government Units, asin sa publiko sa pigtaong suporta asin kooperasyon.
