Aram baya nindo mga ka-bombo, sarong Chinese na babae na igwang malalang vitamin D deficiency na kawsa kan labing paggamit nin sunscreen an nagsapo nin bone fracture maski nagliligid sana sa saiyang higdaan.
Kasuarin sana pigreport kan mga doktor sa XinDu Traditional Medicine Hospital, sa Chengdu, China, an kakaibang kaso kan sarong 48-anyos na babae na nagsapo nin bone fracture.
Sigun ki Dr. Long Shuang, nagkundusir sinda nin test sa babae asin nagluwas na an vitamin D levels kan babae an labing hababa na nagkawsa kan pagluya kan saiyang mga boto na nagresulta man sa severe osteoporosis.
Sa saindang pag-imbestigar pa, an pasyente piglilikayan na mainitan puon pa kan aki ini asin mahilig sa pag-apply nin sunscreen sa saiyang lawas mantang maluwas.
Pigsaysay kan mga doktor na maski an paggamit kan sunscreen asin sun protection an igwang maitatabang sa pagbawas kan mga skin cancer asin iba pang seryosong problema, an nagkapirang indibidwal pig-aabuso an paggamit kaini na minaresulta man sa ibang mga problema.
Huli ta an init kan saldang an importante sa pagtabanag sa lawas na ma-absorb an vitamin D na kaipuhan para sa bone health siringman calcium absorption kun kaya an paglikay digde sa halawig na panahon an kayang makadanyar sa immunity asin buto kan tawo.
An kaso na ini na pigpresentar ni Dr. Long Shuang an nagin viral sa Chinese social media asin an iba pigsaysay na huli sa kamawotan kan babae na magkaigwa nin marhay na kulay kan u-nit kun kaya napuli man sa seryosong problema sa salud.
Sa ngunyan, padagos an pagtataong patanid kan mga doktor sa mga sunscreen enthusiasts na inaabuso na an paglaag kaini na magin panalmingan an nangyari sa nasambitan ng babae.
