Ininganyar ni Department of Energy (DOE) Secretary Sharon Garin an mga konsyumer na gumamit nin solar energy tanganing makatabang sa pagpababa kan gastos sa kuryente.
Segun ki Garin, pinadali na kan departamento an proseso para sa net metering sa paagi nin sarong bagong circular.
Mas pinaparikas na an mga aplikasyon asin permitting process para sa mga mapakabit nin solar panel na gagamiton sana sa sadiring harong o negosyo.
Sa presente, an Pilipinas saro sa mga nasyon sa kinaban na igwang pinakadakol na nababakal asin nao-order na solar equipment.
Dawa halangkaw an mga numerong ini, binigyang-doon kan kalihim na dakol pa man giraray na harong asin negosyo an pwedeng makabenepisyo digdi.
Ipinahayag man niya na apwera sa pagtitipid sa bulanan na bill, dakulang tabang man an paggamit nin solar energy sa tahaw kan epekto kan El Niño sa supply nin kuryente.
Alagad, ipinagirumdom kan DOE na seguraduhon na marhay an pagkakakabit kan mga kagamitan.
Abiso ni Garin, magbakal sana sa mga akreditadong supplier asin likayan an pagbakal sa mga bakong beripikadong seller sa social media tanganing makalikay sa aksidente o kasulo.
