NAGA CITY – Pigheras kan DepEd- Camarines Sur an mga panundon asin polisiya sa enot na aldaw kan pagbukas kan school year 2025-2026.
Sa entrevista kan Bombo Radyo Naga ki Atty. Salvador Bogs Pelingon, Division Information Officer, DepEd – Camarines Sur, sinaysay kaini na kun manunutaran preparadong-preparado na an mga eskwelahan kun saen ngunyan na aldaw, nagkaigwa na nin enot na flag raising ceremony asin nagkaigwa na nin mga orientation sa mga estudyante.
Katakod kaini, manlaen-laen man an paaging piggibong pagpuon kan klase kan mga eskwelahan, an iba soboot nagkaigwa nin opening program tanganing mas lalong mamatean kan mga estudyante na welcome an mga ini sa enot na aldaw kan pagbubukas kan klase.
Dugang pa ni Pelingon, basado sa datos kan saindang opisina, mapakol sa labi 250, 000 an enrollees ngunyan na school year sa enterong Camarines Sur, siring man an nasambitan ng numero an enrollees puon kan magbukas an early registration puon kan nakalihis na bulan kan Enero hasta ngunyan sa presente.
Sigun pa sa opisyal na hasta sa ngunyan igwa pang mga eskwelahan na padagos na nagi-input nin data sa saindang online portal kaya sa ngunyan piglalaoman pa kan saindang opisina an pagdugang kan numero kan mga estudyante.
Mientrastanto, sa pagbukas man kan enot na aldaw kan ereskwelahan, pigsaysay pa ni Pelingon na mayong koleksiyon maski na soboot sa PTA sponsor, asin dapat dae ini ulang sa mga estudyante na magpadagos sa saindang paglaog sa eskwelahan.
Pigtawan-duon pa ni Pelingon na dapat sa enot na aldaw kan school year 2025-2026 dapat na ma-orient an gabos mapadapit sa anti-bullying magin sa child protection policies kan DepEd na kun saen padagos na pigkakampanya na maipalakop tanganing aram kan mga kaakian an mga dapat asin dae dapat gibuhon sa laog kan eskwelahan.
Sa ngunyan, pagiromdom na sana ni Pelingon orog na sa mga estudyante na likayan na magin magulo sa laog kan eskwelahan asin lugod dae magin rason kan kariribokan huli man ta an DepEd an igwa soboot mga polisiya asin panundunan na dapat an mga estudyante an nagsusunod digde, tanganing malikayan an anuman na insidente sa laog kan eskwelahan.
