NAGA CITY- Labing kaogmahan an namatean kan sarong indibidwal makalihis na makua an pang walong pwesto sa pigkundusir na May 2025 Licensure Examination for Dentist.
Sa entrevista kan Bombo Radyo Naga ki Dr. Deborah Jane Orfanel, Top 8 sa May 2025 Licensure Examination for Dentist, sinaysay kaini na enot na pagkakataon sa saindang pamilya na igwang nag top notcher sa board exam.
Huli kaini, labi an saiyang pasasalamat sa Kagurangnan para sa trayumpo na saiyang naabot.
Sigun ki Orfanel dae nagin madali an pinag-agihan kaini antes an eksaminasyon asin maaraman an resulta, kaipuhan soboot nin labing pagtitiyaga asin pagtao nin bastanteng oras tanganing makapag-focus sa eksaminasyon.
Katakod digde, nagset ini nin limitasyon sa paggamit kan social media tanganing makapreparar asin magin disiplinado.
Alagad dae man boot sabihon na lingawan na an pagpapahingalo asin paghugot nin mga motibasyon sa mga bagay na nahihiling online.
Kaipuhan sana soboot naka-focus an isip sa kun ano an pigmamawot kaini sa ngunyan.
Pigsaysay pa ni Orfanel na an talagang saiyang obheto an mag top sa board exam, ini soboot an nagseserbeng manifestation asin nagpapakusog kan saiyang boot mantang nag-aagi sa proseso kan pag-utob kan saiyang pangiturugan sa buhay.
Sa ngunyan, pigpayuhan na sana kaini an mga mawot na magsabak sa siring na field na magin preparado sa kakahampangon na mga huma asin pirmeng maghagad nin giya sa Kagurangnan.
