Matao an gobyerno kan Amerika ning $30 million para sa humanitarian aid sa war-torn territory na Gaza. Itatao an nasambitan ng kantidad nin tabang gikan sa US Agency for International Development sa Gaza Humanitarian Foundation (GHF) na mahatod kang mga tabang sa Gaza.
Dawa haloy nang sinusuportahan kang Amerika sa diplomatikong aspeto an nasambitan ng grupo, ini naman an inot na pagkakataon na nagtao an Amerika nin pinansiyal na tabang sa organisasyon para sa Palestinian enclave.
Inaprubaran an nasambitan ng humanitarian aid kan Biyernes sa irarom kan priority directive gikan sa White House asin State Department kun sain nasa $7 million na an inisyal na na-disburse.
Sigun pa sa duwang sources na dae na pinangaranan, posibleng aprubaran pa kan Estados Unidos an dugang na bulanang grants na nag aabot sa $30 million para sa Gaza Humanitarian Foundation.
An nasambitan ng lakdang kang Amerika an kasunod naman kan nainot nang naireport na paghurot kang Israel sa administrasyon ni US President Donald Trump na magtao nin $500 million sa Gaza Humanitarian Foundation.
An kahurotan man kan Israel an sa tahaw kan naglalang humanitarian crisis sa Gaza kawsa kang dae pa man natatapos na giyera sa pag-ultanan kan Israel asin Hamas na nagresulta sa pagkagadan kang labi 57,800 katawo kun saen 56,152 digdi an Palestinians mantang 1,706 man an Israelis, base sa datos kan Gaza Health Ministry.
