Aram baya nindo mga ka-bombo, labi an kakilhagan kan sarong lalaki gikan sa Texas kan madiskubrer kaini na kasal na palan sa saiyang dating fiancee maski mayo ining pagtugot.
Susog sa report an 42-anyos na lalaki na dae naman pinangaranan pig-ako na ini an dating igwang relasyon ki Kristin Marie Spearman asin nagbisita sa Wayne County clerk’s office tanganing magkua nin marriage license.
Alagad nagkaproblema soboot sindang duwa na nagin rason tanganing magsuwayan an lalaki asin si Spearman asin dae madagos an kasal.
Kasuarin sana pirang aldaw makalihis an pagsuhayan kan magka-ilusyon nakareseber soboot nin regalo an lalaki gikan sa Bath & Body Works, na igwang produkto siringman kopya kan officiated marriage license na igwang petsa na June 13, 2025 kun saen yaon an pangaran kaini asin kan saiyang dating fiancee.
Apwera digde, laog man kan regalo an ladawan kan saiyang ex-fiancee kapot an dokumentos na nagpapatunay na sinda an legal na ikinasal.
Sigun sa sarong website, an siisay man na mag-ilusyon an kinakaipuhan na personal asin igwang valid identification tanganing makakua nin marriage license.
Alagad sa kaso na ini, pinagtutubudan na an ex-fiancee kan lalaki nagkua nin local pastor tanganing sertipikahan an kasal maski mayo an personal na presensiya kan groom.
Sa ngunyan, katakod kan pangyayari padagos an paglalapigot kan lalaki na maitama an gabos mantang pig-arestrar man an ex-fiancee kaini para sa kasong third-degree felony stalking.
