Kinumpirmar kan Department of Justice na igwang imbwelto soboot na nagkapirang haralangkaw na opisyal kan gobyerno sa pagkawara kan mga dae pa nanunutarang mga sabungero.
Sigun mismo ki Justice Secretary Jesus Crispin Remulla, kaiba ini sa mga isinawalat kan naglantad na testigong binisto komo si alyas ‘Totoy’.
Alagad saiyang paglilinaw na ini an sainda pang padagos na iniimbestigaran asin pinag-aadalang marahay tangani dagusang matukoy an katotohanan sa likod kan pagkawara kan mga sabungero.
Hurot kaya kaini na bako ining sarong ordinaryong kaso sana kundi saiyang pigkokonsiderar an isyu komo organisadong krimen kaya man masusing pag-iimbestigar an saindang ipinapautob.
Huli man digde, pigheras pa ni Justice Secretary Remulla an saiyang paglilikay orog na sa mga impormasyong iniluluwas sa publiko. Marurumduman na saiyang enot na sinaysay na haloy na kaining nakaulay an testigong saro sa mga akusado na binisto komo si alyas ‘Totoy’.
Antes pa soboot mag-eleksyon, nakaulay na kan sekretaryo si alyas ‘Totoy’ kaya man kapot na kan kagawaran an impormasyong isinawalat ini. Kahagadan pa ni Justice Secretary magin sa mga kaparientes kan mga nawawarang sabungero na tawan ini nin dugang pang panahon tangani magkakaigwa nin kaliwanagan sa nasambitan ng kaso.
Marurumduman sa sarong entrevista na inilantad kan binistong testigo na si alyas ‘Totoy’ na an mga nawawarang sabungero an ginadan asin inilubong sa parte kan Taal Lake.
Pigdugang pa kaini na bako sanang 34 sabungero an nawawara kundi nasa 100 katao an kaiba sa mga nagin biktima sigun sa saiyang mga pigheras na sinabi man ni Justice Sceretary Jesus Crispin Remulla.
Sa presente, padagos pa man an saindang pag-iimbestigar kasabay kan pagsiguro kan kagawaran na dae ninda pinababayaang malingawan na sana an nasambitan ng isyu.
