Kumpiyansa si Senador Jinggoy Estrada na maaaprubaran asin maisasaley an saiyang pigbubusol na propwestong ley tanganing dagusan nang halion an Senior High School — an dugang na duwang taon kan pag-aadal.
Sigun ki Estrada, magin si Department of Education (DepEd) Secretary Sonny Angara asin Presidente Ferdinand Marcos Jr., an nagpahayag na igwa nin problema sa pagpapautob kan K-12 curriculum.
Mientrastanto, nagtutubod man si Estrada na posibleng pagdebatehan sa plenaryo an saiyang pigsunad na halion an SHS asin an pigbubusol ni Senador Sherwin Gatchalian na bawasan nin sarong taon an pag-aadal kan mga estudyante sa kolehiyo.
Alagad nanindogan ini na dapat na talagang halion an SHS.
Liwat pigsunad ni Estrada sa 20th Congress an propwestong ley na igwa nin obhetong halion an dugang na duwang taon kan pag-aadal kan mga estudyante o an SHS.
Sinaysay ni Estrada an pag-amin kan mga opisyal kan DepEd na dae pa naaabot kan SHS program an obheto kaini para sa mga K to 12 graduates huli sa kadakol na curriculum, over-worked an mga paratukdo asin estudyante, hababang employment rate kan mga nagtapos kan SHS — 10% sana an naglaog sa labor force, kadaklan pa an sa informal sector.
Sa irarom kan rationalized basic education program, pigsuhestyon ni Estrada an sarong taong edukasyon sa kindergarten, anom na taon sa elementarya asin apat na taon sa secondary education.
