Matenir sa limang taon an termino kan mga opisyales kan barangay asin Sangguniang Kabataan (SK) matapos pagtibayon kan Supreme Court (SC) sa konstitusyonalidad kan linya na nagpapahaba kan saindang panunungkulan.
Pinagbasura kan Kataas-taasang Hukuman an petition na inihain ni election lawyer Atty. Romulo Macalintal laban sa Republic Act No. 12326, na nag amyenda kan dati na apat na taong termino kan mga halal na opisyal kan barangay asin SK.
Sa desisyon na sinurat ni Associate Justice Rodil Zalameda, ipinaliwanag kan Korte na an nasabing batas nagtutukoy kan laba kan panunungkulan kan mga opisyal asin dai sana basta nagpapaliban sa halalan.
Huli digdi, sa Nobyembre 2028 gigibuhon an sunod na Barangay asin Sangguniang Kabataan Elections (BSKE). Pagkatapos kaini, kada limang taon na isasagibo an mga masunod na halalan.
Magigiromdoman man na pinirmahan ni President Ferdinand Marcos Jr. an RA 12326 kan Setyembre 24, 2026. Sa irarom kan batas, hale sa apat na taon nagin limang taon an termino kan mga opisyal kan barangay asin SK, dahilan para mailipat sa Nobyembre 2028 an eleksyon na nakatalaga sana ngunyan na Nobyembre 2026.
Dai pinalampas ni Macalintal an nasabing pagbabago asin naghain siya nin petisyon sa Supreme Court tanganing kwestiyunon an legalidad kaini.
Sa saiyang petisyon, kinwestiyun an pagpapalaba kan termino kan mga presente na opisyales nang dai muna giginuhon an eleksyon, na may kaangayan sa karapatan kan mga tawo na pumili kan saindang lider sa barangay asin SK.
Sa ibong kaini, binasura kan Supreme Court an saiyang petisyon asin namantenar an bisa kan RA 12326.
