NAGA CITY- Pig-enkaminar kan sarong opisyal sa banwaan nin Pili an mga bagong nagtukaw na mga government officials na lingawan na an politika asin mag pokus sa saindang trabaho.
Sa entrevista kan Bombo Radyo Naga ki Jerry Canave, Barangay Kapitan kan Caroyroyan, Pili, Camarines Sur, sinaysay kaini na an marhay na paggogobernar an nagpupuon sa tawo bako sa mga politiko.
Boot sabihon, an pagkakaigwa nin marhay na gobierno an dapat nakasentro sa ikakamarhay asin ikakauswag kan komunidad.
Sigun pa ki Canave, para sa saiya an good governance nakasentro sa pagpapakusog asin pag-utob kan pig-aapod na apat na pillars; economic development, social development, infrastructure development asin an environmental development.
Kun an apat na ini an nag-iiral asin namamatean kan publiko mababawasan an problema asin posible soboot na mayo nang magreklamo na mga tawo.
Apwera digde, kinakaipuhan man an pagkakaigwa nin pagkakasararo tanganing maabot an minamawot para sa nasasakupang lugar siringman para sa bilog na nasyon.
Pigsaysay pa kan opisyal na kaipuhan an tamang pagkapot asin utilization kan kwarta tanganing dae masayang an pondo asin malikayan an anuman na klase kan korupsyon.
Sa ngunyan, hagad na sana kaini an kooperasyon kan publiko para sa pagpapamarhay kan saindang banwaan.
