NAGA CITY – Padagos an pagmonitor kan Local Disaster Risk Reduction and Management Office (LDRRMO) Camaligan katakod kan naeksperyensiyahan na mauran na panahon.
Sa entrevista kan Bombo Radyo Naga ki JM Estrella, Ldrrmo Assistant Planning kan Camaligan, sinaysay kaini na sa ibong kan epekto kan bagyon Crising asin habagat, mayo man nin nairehistong nagbaha o anuman na insidente sa saindang banwaan na igwang kinaaraman sa raot kan panahon.
Sigun ki Estrella, dakulang tabang an pigsagibong declogging sa mga kanal kan mga residente sa lambang barangay tangani na dae maglangkaw an tubig sa lugar.
An nasambitan ng lakdang an padagos na ipapautob sa banwaan nin huli ta nagin marhay an epekto kaini asin parte na ini kan Prevention and Mitigation.
Mientrastanto, nasa 100% man na preparado an saindang ahensya sa papaabuton pa na bagyo sa mga masurunod na bulan. Nin huli ta nagdugang sinda nin duwang rescue boats asin padagos na pagpapalinig sa palibot kan lambang harong.
