Nagpaluwas an Malacañang nin Memorandum Circular No. 133 sarong kasuguan nin alternative work arrangements sa mga opisina kan gobyerno sa 15 probinsya sa Luzon ngunyan na Martes, Setyembre 1, 2026, huli sa pinaglalaoman na padagos na makusog na pag-uran huli sa Habagat.
Kabali sa mga sakop na probinsya an Ilocos Norte, Ilocos Sur, La Union, Pangasinan, Abra, Benguet, Kalinga, Mountain Province, Apayao, Batanes, Nueva Vizcaya, Zambales, Tarlac, Pampanga asin Bataan.
Mientrastanto, ipapautob man sa mga pampubliko asin pribadong eskwelahan sa mga nabanggit na lugar an alternative learning modes asin learning continuity measures sa gabos na antas, apwera na sana kun may iba pang isusugo an saindang local chief executive.
Sigon sa Malacañang, ginibo an lakdang na ini kasunod kan rekomendasyon kan National Disaster Risk Reduction and Management Council o NDRRMC, huli sa inaasahan na makusog na pag-uran na posibleng magkawsa nin pagbaha asin problema sa daloy kan trapiko.
Padagos an operasyon kan mga ahensiya na nagtatao nin basic asin health services, disaster preparedness and response, asin iba pang mahahalagang serbisyo.
Para man sa pribadong sektor, nasa pamayuhan kan lambang kompanya o tanggapan an pagdesisyon kun masuspende nin trabaho o mapautob nin alternative work arrangements.
Pwede man magpautob an mga local chief executive nin localized suspension o pagkanselar kan klase asin trabaho sa mga lugar na dai sakop kan memorandum, base sa mga ipinapautob na patakaran.
