Photo© web

Aram baya nindo mga ka-bombo, sarong 16-anyos na babae gikan sa Hunan province kan China an kadikit pang bawian nin buhay makalihis na purbaran an peligrosong pagbawas nin gabat sa paagi kan pagkakan nin gulay asin laxatives.

Susog sa report, huli sa desperadong pagpurbar kaini na mag-fit an saiyang birthday dress, an nasambitan ng teenager na pigbisto na si Mei, pig-adaptar an sarong crash diet na napuli sa pagkaka-ospital kaini.

Sigun ki Mei, sa laog nin duwang semana, kadikit na portion sana kan gulay asin laxatives an saiyang pigkakakan.

Huli digde, nawaran nin kusog an saiyang mga braso asin bitis siringman nadipisilan sa paghangos.

Advertisement

Katakod digde, sa Emergency blood tests nahiling na an blood potassium levels ni Mei an nagbaba asin nabugtak sa peligrosong lebel na nagresulta sa kondisyon na pig-aapod na hypokalaemia.

Enkaso mapabayaan an nasambitan ng kondisyon, ini an pwedeng magkawsa nin respiratory failure asin biglaan na cardiac arrest.

Huli sa pangyayari, nabugtak si Mei sa emerhensiya kun saen kinaipuhan kaini nin 12-hour medical procedure tanganing makasalbar.

Mientrastanto, makalihis an operasyon, milagrong nakasalbar si Mei asin dagusan nang nakaluwas nin ospital.

Sa ngunyan, nagpagirumdom an mga eskperto sa publiko na sunudon an mga giya sa tamang pagbawas nin gabat tanganing dae mabugtak sa alanganin na sitwasyon.

Advertisement