NAGA CITY- Nagtitinir na salbado an mga Pinoy sa nasyon kan Thailand maski nagpapadagos an labanan sa pag-ultanan kan Cambodia asin Thailand.
Sa entrevista kan Bombo Radyo Naga ki Bombo International News Correspondent Mae Yang gikan sa Thailand, padagos an saindang trabaho asin nakakaluwas man kan saindang mga kaharongan sa ibong kan kariribukan.
Dugang pa kaini, pig-asegurar man kan Thai Government na salbado an saindang mga residentes magin an gabos na mga tawo na yaon sa saindang nasyon sa presente.
Marurumduman, sa ibong kan pag-anunsyar ni US President Donald Trump na nagkasundo na an duwang nasyon para sa ceasefire talks padagos pa man giraray an nasambitan ng kariribukan.
Mapakol na sa 35 katawo an binawian nin buhay mantang igwang 200 na iba pa an lugadan siringman labi 200,000 na an pig-ibakwar huli sa kariribukan.
Marurumduman pa, parehas pig-akusaran kan magkaibong na lado na an kada saro an nagpuon kan pag-atake kun kaya orog na naglala an kariribukan sa border.
Nakatalaan man na mag-meeting an lider kan duwang nasyon sa Malaysia tanganing pag-ulayan an ceasefire.
Mientrastanto, para man sa SONA na ikukundusir sa presente, kamawotan soboot na madangog kan mga Filipino Community sa Thailand gikan sa Presidente an pagkakasararo, mayong ribok asin marhay na gobierno.
Sa ngunyan, pigsierto na sana ni Yang na nagtitinir na marhay an saindang kamugtakan sa Thailand asin normal an saindang pagbuhay.
