Pigbalyo kan Mexico sa Estados Unidos an 26 na preso na soboot may importanteng papel sa mga makapangyarihang drug cartel siring na sana kan Jalisco New Generation (CJNG) asin Sinaloa Cartel.
Sigun sa mga opisyal kan Estados Unidos, kabali sa mga ini an mga “key operatives” na naaatubang sa mga kasong kadahasan asin organisadong krimen sa mga korte sa Amerika.
Binisto kan Mexico an mga bilanggo komo huma sa pampublikong seguridad.
Bagaman dae pinangaranan an kadaklan, saro sa mga pigbalyo iyo si Roberto Salazar, na pigkokonektar sa paggadan sa sarong deputy sheriff sa LA County.
Pigbalyo man an sarong babaeng akusado nin drug trafficking kan nakalihis na 2016–2017,alagad dae pa sigurado kun kabali ini sa 26.
Napagaraman na an extradition an isinagibo sa kondisyon na mayong saro man sa sainda an maatubang sa padusang kagadanan —sarong patakaran na haloy nang pinaninindugan kan gobyerno kan Mexico.
Siringman ini na an panduwang dakulang extradition ngunyan na taon, kasunod kan 29 kataong pigbalyo sa US kan nakalihis na bulan nin Pebrero, kabali si Caro Quintero, an pigtutukdong utak sa paggadan sa DEA agent na si Enrique ‘Kiki’ Camarena kan nakalihis na 1985.
Mientrastanto pinahimutikan ni Mexican President Claudia Sheinbaum an mga report na tinugutan ni U.S. President Donald Trump an mga US agent na mag-target nin cartel leaders sa laog nin Mexico, alagad pighurot man na nagpapadagos an kooperasyon sa pag-ultanan kan duwang nasyon, orog na sa kampanya laban sa fentanyl trafficking.
