Pig-ako kan Philippine Amusement and Gaming Corporation (PAGCOR) na mayo sindang magiginibo dapit sa mga iligal na online gambling sa nasyon.
Sigun ki PAGCOR Chairman Alejandro Tengco, bulan-bulan nakakareseber sinda nin 2,000 reklamo sa online gambling kun saen 1,200 na reklamo o 60% an nagtutukoy sa illegal operators kan online gambling asin mayo sindang maginibo dapit digde.
Alagad paliwanag ni Tengco, mayo kaya sindang charter kan kapangyarihan sa mga illegal online gambling kaya nakikipag-koordinar sinda sa mga magkakanigong ahensya tanganing habulon an mga nasa likod kaini.
Mientrastanto, aminado man si Tengco na siertong mababa an income sa paghali nin link kan online gambling sa mga e-wallets.
Sa ibong kaini, prepado man an PAGCOR na magsunod asin ipautob an pag-delink basado sa pigpaluwas na regulasyon kan Bangko Sentral ng Pilipinas (BSP).
Nagpahayag naman ibang mga e-wallet kan saindang kapreparaduhan na magsunod sa kasuguan kan BSP na halion an link kan saindang payment apps sa mga online gambling platforms.
