Nagheras nin panibagong update sa saiyang salud an Philippines’ Queen of All Media na si Kris Aquino alagad ngunyan mas nakakahadit nang kondisyon kan helang.
Sa saiyang Instagram post kansuarin sana, pigheras kaini kun pano an saiyang mga doctor naka diskubre nin iba sa saiyang blood panel results na nag resulta man sa panibagong serye naman nin pagsairarom sa manlaen-laeng tests na kun saen manlaen-laen man na espesyalista an nag hihiling sa saiyang kaso.
Nagsasairarom man si Kris sa isolation sa laog nin anom na bulan para sa pagpadagos kaining paglaban sa saiyang pigmamateng helang.
Marurumduman na-diagnose si Kris nin pirang autoimmune diseases na kun saen napiritan na mag pasiring sa Estados Unidos para sa treatment asin nakabalik sana ning Pilipinas kan nakalihis na taon.
Pigheras pa ni Kris na saro sa saiyang mga Doktor an nag kumbinsi igde na magsairarom sa ultrasound na saiyang labing kinatakutan huli ta mabisita sana kuta ini nin hospital para sa second dose kan medication.
Pigheras pa kaini kun pano an saiyang mga doctor pig isplikar an gurano ka importante an oras sa saiyang kundisyon ngunyan orog na ta dae pwedeng ma-delay an ano man na treatment plan.
Mientrastanto, kaibahan ni Kris sa ospital an saiyang aki na si Bimby Aquino Yap, na kun saen mayo pa soboot tultol na turog magpuon kan ma-confine ini.
Sa ngunyan, hagad pa ni Kris an padagos na pagpangadyi kan saiyang mga followers para sa pag improve pa kan saiyang salud. Nagtitinir ini na may paglaom na malalagpasan an gabos asin makakakayang malabanan an saiyang helang.
