Nagdanay na pangenot na prayoridad kan Kamara an edukasyon sa ipinapanukalang 2027 national budget, mantang dinagdagan man nin P12.23 bilyon an pondo para sa sektor nin salud.
Sa House General Appropriations Bill na aprubado sa ikaduwang pagbasa, nagdanay sa P1.107 trilyon an pondo para sa edukasyon.
Nagtao man nin dugang na P10.055 bilyon para sa mga programa kan sektor, kaiba an pinansyal na tabang sa mga estudyante, paghirahay kan mga eskwelahan, kaligtasan sa eskwelahan asin pagbawi sa nawarang pagkanood.
Kaiba digdi an P2.1 bilyon para sa Tertiary Education Subsidy, P1.77 bilyon para sa Tulong Dunong Program asin P952 milyon para sa pagtogdok asin paghirahay kan mga pasilidad kan eskwelahan.
Mientrastanto, naglangkaw sa P358.82 bilyon an ipinapanukalang pondo para sa salud, hale sa P346.59 bilyon sa National Expenditure Program (NEP).
Sa dugang na pondo para sa mga serbisyong pangkalusugan, P23.97 bilyon an itinao sa Medical Assistance Program tanganing palawigon an tabang sa pagbulong asin suportahan an zero-balance billing sa mga pampublikong ospital.
Segun ki House Appropriations Committee Chairperson Rep. Mikaela Angela B. Suansing, siniguro kan Kamara na mapagdanay an kabilugan na pondo para sa edukasyon mantang dinadagdagan an suporta sa serbisyong pangkalusugan.
Sa Lunes, October 12, 2026 nakatalaan na pag-ulayan asin botohan kan Kamara an ipinapanukalang budget sa ikatolong asin huring pagbasa, asin pagkatapos kaini kun maaprubahan, ipapasa an panukala sa Senado para sa sadiri kaining proseso nin pag-apruba.
