Pigkokonsiderar ni Senador Ping Lacson an probinsya kan Bulacan na pinaka-notoryus sa mga anomalya na flood control projects.
Sa saiyang privilege speech, pigbuyagyag kan senador an korapsyon kan duwang tinanggal na district engineer sa Bulacan First Engineering Office na iyo si dating District Engineer Henry Alcantara asin an nagribay kaini na si dating Assistant District Engineer Brice Hernandez.
Sigun sa senador, sa pamamayo kan duwang ini sa nasambitan ng opisina, 28 proyekto para sa taon 2024 an nagkakaigwa nin parehas na kantidad nin pondo dawa ngani magkaiba an sukol kaini. Nabareta pa na an saro sa sainda nakakapadaog nin hundred million sa sarong casino sa Manila.
Pigtuyaw man ni Lacson an kwestionableng flood control project sa banwaan nin Arayat, Pampanga makalihis na madanyaran giraray an riverbank mitigation structure sa Candating dawa ngani nagkapirang beses na ining pighirahay asin pinansiyahan kan gobyerno.
Sigun sa report, kan Hulyo 2025 pa sana nagrasay giraray an parte kan istruktura makalihis an an bagyong Emong, dawa na natapos an pinakahuring paghirahay kan Hunyo ngunyan na taon.
Sinabi ni Lacson na an pondo para sa proyekto nagpoon kan 2018 na may ₱20 milyon na nakatagama para sa “konstruksyon o rehabilitasyon kan slope protection sa kalabaan kan Pampanga River, Candating Section, Arayat, Pampanga.”
Alagad, dae naghaloy naraot man giraray. Poon sa orihinal na ₱20 milyon kan 2018, an total na gastos kan parehong flood control structure nagpakol na sa labing ₱274.8 milyon—o paglangkaw nin labing 815% kumparar sa enot na konstruksyon.
Sinaysay man kaini na an Eddmari Construction and Trading iyo an kontratista na pirming napipili para sa proyekto. An nasambitan ng kompanya an dati nang na imbwelto sa manlaen-laen na kontrobersiya, kabali an pag-delist komo sarong DHSUD builder kan 2023.
Mientrastanto, ihinayag kan senador na 40% sana kan mga pondo an napapaduman sa flood control projects. Sa breakdown kan senador, 8-10% an napapasiring sa mga district engineers, 2-3% an maduman sa kickback kan district engineering office gikan sa sobrang kita kan contractor, 5-6% an napapaduman sa mga miyembro kan Bids and Awards, 0.5-1% an para man sa Commission on Audit, asin 20-25% an para sa mga funder o pulitikong naghanap nin pondo para sa proyekto
