Nagpasiklab si two-time World Junior Championships campaigner Micaela Jasmine Mojdeh sa 2025 PAI National Swimming Tryouts tanganing makasierto nin tiket sa 2025 Southest Asian Games na gaganapon sa Bangkok, Thailand sa Disyembre.
Iniluwas ni Mojdeh an bilog na pwersa kaini tanganing masungkit an ginto sa women’s 200m butterfly sa rekas na duwang minute asin 18.18 Segundo.
Nalampasan kan pambato kan Behrouz Elite Swimming Team an qualifying time standard (QTS) na 2:18.26 tanganing makua an saiyang tiket sa Thailand SEA Games.
Dae pa nagpaawat si Mojdeh an pigkonsiderar na ‘water beast’ sa swimming community, makalihis na magningning sa women’s butterfly kun saen nakapagrehistro ini nin 1:01.89 tanganing maabot an 1:02.19 qualifying time.
Ini an primerong pagkakataon na mahihiling sa SEA Games si Mojdeh makalihis an impresibong kampanya kaini sa juniors division.
Kan nakalihis na aldaw, nagbiyahe na pa-Amerika si Mojdeh tanganing puonan an saiyang college days sa University of Southern California kun saen parte ini kan Trojans swimming team.Laog man sa national team si Filipino-British Heather White na nagpasiklab sa tolong events.
Enot na nag-arangkada si White sa women’s 100m freestyle kan itarak kaini an impresibong 56.23 segundo — harayo sa QTS na 58.23 segundo.
Nakapagkurit man nin magayon na oras si White sa 200m freestyle na 2:05.40 tanganing malampasan an 2:07.17 qualifying antes tapuson an kampanya kaining bibit an 25.70 segundo sa 50m freestyle tanganing maabot an 26.13 qualifying norm.
