Iimbestigaran kan House Committee on Justice, na pinamamayuhan ni Batangas 2nd District Rep. Gerville Luistro, an extradition request kan Estados Unidos ki Pastor Apollo Quiboloy tanganing magin malinaw soboot an mga isyu kan proseso.
An pagsasagibo kan motu proprio investigation an dara kan kahagadan ni Akbayan Party-list Rep. Perci Cendaña, na nanganapodan sa komite ni Luistro na magsagibo nin inquiry in aid of legislation katakod kan extradition request ki Quiboloy.
An pormal na mosyon tanganing idagos an imbestigasyon an pigsunad ni Committee Vice Chairman, Bukidnon 2nd District Rep. Jonathan Keith Flores.
Inaprobaran ni Luistro an mosyon makalihis na mayong magtutol gikan sa mga miyembro.
Alagad bago ini, nagsagibo muna nin masusing pag-urulay an mga lehislador dapit sa pangangaipuhan nin imbestigasyon.
An duwa soboot importanteng ley na dapat pag-uklayan – an 1994 extradition treaty sa tahaw kan US asin Pilipinas asin an PD 1069 o an Philippine Extradition Law na naisaley kan taong-1977.
Sigun sa saiya, an duwang ley an “silent” sa nagkapirang importanteng detalye.Ipinunto man ni Flores na an presenteng mga ley an bakong malinaw kun sisay an mga otoridad na nagpili sa tahaw kan temporary surrender asin deferred surrender kan extraditee sarong bagay na inako man ni Luistro.
Nilinaw man ni Luistro na an pagkaka-imbwelto ni Kingdom of Jesus Christ (KOJC) church founder na si Quiboloy sa imbestigasyon an insidental sana.
Sinaysay ni Luistro na paghihingowahan kan saiyang komite na pakusugon an extradition framework kan nasyon, siertuhon an pagpataw kan paninimbagan asin patatagon an promesa kan administrasyon sa pakikipagtabangan kan Pilipinas sa ibang nasyon kontra sa malalang mga krimen mantang piggagalang an kalayaan kan mga hukuman.
