NAGA CITY- Nagpagirumdom an Presidente kan FETODA sa mga tricyle driver asin mga kolurom na mabiyahe sa siyudad nin Naga sa nararaning Peñafrancia Fiesta na sunudon an tamang pamamasada.
Sa entrevista kan Bombo Radyo Naga ki Gil Belen, FETODA President, sinaysay kaini na padagos soboot an saindang pagtaong abiso sa mga driver na dae mag overload, overprice asin iba pang bayolasyon tanganing dae mahampang sa magkakanigong penalidad.
Sigun pa sa opisyal, ngunyan na nararani na an Peñafrancia Fiesta puspusan man an saindang pagtutok sa mga terminal tanganing masierto na an gabos na mga driver an nagsusunod sa saindang piglatag na mga panundunan.
Katakod digde, liwat na pig-enkaminar kan opisyal an mga pasahero orog na an mga nagdadayo sa siyudad na maglunad sana sa mga lehitimong tricyle driver asin bako sa mga kolurom.
Saro kaya sa mga nagigin problema sa presente an mga nagbabiyahe na mga kolurom sa ipinagbabawal na mga lugar kun saen pag sinitar kan mga otoridad o kaya kan mga igwang prangkisa iyo pa soboot an mga anggot.
Huli digde, pig-enkaminar ni Belen an publiko na kuanan nin ladawan an mga kolurom na behikulo tanganing magibuhan nin magkakanigong lakdang.
Sa ngunyan, hagad na sana kan opisyal an kooperasyon kan gabos tanganing magin marhay an lado kan transportasyon sa bilog na siyudad nin Naga.
