NAGA CITY- Nagdestrebwer an Bureau of Fisheries and Aquatic Resources Bicol nin 62-foot tuna handline fishing boats sa manlaen-laen na probinsiya sa Bicol Region.
Sigun ki Rowena Briones, tagapagtaram kan BFAR Bicol, an nasambitan ng lakdang an makakatabang sa kabuhayan kan mga parasisira asin masierto an bastanteng suplay kan sira.
Katakod digde, an kada bangka an nagkakantedad nin nasa P7 million.Pigsaysay pa kan opisyal na an saindang opisina sa paagi kan Fisheries Production and Support Services Division pigdestrebwer an tolong units kan 62-foot boats asin saring ganet fishing boat.
Ini an parte kan distribusyon sa mga probinsiya siring kan Catanduanes, Sorsogon, Camarines Norte, asin Masbate.
An bangka na ini an kumpleto sa mga modernong fishing technology.
Apwera digde, pigdesinyo pa an nasambitan ng bangka para sa mga hararaom na kadagatan para sa mas salbadong pagsisira.
Mientrastanto, an pinaka-kalakawan soboot kan bangka an para sa kabuhayan alagad kun magtugot man an benipisyaryo pwede man ining magamit komo transportasyon o kaya service kan komunidad.
