Dakula an pagtubod ni Commission on Audit (COA) Chairperson Gamaliel Cordoba na tulos aaksyunan kan Office of the Ombudsman an saindang rekomendasyon nin pagsusunad nin kaso sa mga opisyal kan Department of Public Works and Highways (DPWH) asin kontratista katakod man kan maanomalyang flood control projects sa Bulacan na may kabilugang kantidad na haros P350 milyon.
Sinaysay ni Cordoba na matitibay an mga ebidensyang kapot kan ahensya na saindang isinumiter sa Ombudsman kan nakalihis na aldaw makalihis man an isinagibong fraud audit asin imbestigasyon.
Basado sa limang Fraud Audit Reports kan COA, nadiskubreng sablay asin pano nin mga iregularidad an mga proyekto kan Wawao Builders, St. Timothy Construction Corporation, asin SYMS Construction Trading na sakop kan DPWH Bulacan 1st District Engineering Office.
Sa proyekto kan Wawao Builders sa Brgy. Frances, Calumpit na nagkakantidad nin P77.2 milyon, nadiskubreng dae natapos an floodwall asin hasta sa 77.9 metro na sana an nagibo gikan man sa orihinal na 124 metro, may dugang pang bayad na P3.1 milyon na mayong kaukulang dokumento asin may nahiling man digde na darakulang bitak.
Sa saro pang proyekto kan parehong kumpanya sa Brgy. Sta. Lucia na nagkakantidad nin P74 milyon, haros 90 porsiyento an sinasabing natapos sa papel alagad dae ini napatunayan kan mga auditor, orog na ta aktwal na tumambad sa sainda na may bitak asin nakatagilid an dike.
Sa kaso man kan St. Timothy Construction sa Bulusan, Calumpit na nagkakantidad nin P96.5 milyon, may nahiling an COA na labi sa P38 milyon na diperensya sa gastuson, mayo man na bastante na dokumento tangani patunayan an dredging asin man paggamit nin mga materyales.
Sa saro pang proyekto kan kumpanya na nagkakantidad nin P39.1 milyon, nagluwas na kabanga sana kan bakal an naibugtak alagad buo an kabayadan, may nadiskubre pang labot sa pader.
Pinakamatinding kaso iyo an sa SYMS Construction Trading na may kontratang P55.7 milyon para sa floodwall sa Baliuag kun saen mayong nahing aktuwal na konstruksyon an COA sa mismong site alagad nakabugtak sa rekord na bayad na an proyekto.
Kabali sa mga dawit sinda District Engineer Henry Alcantara, Assistant District Engineer Brice Ericson Hernandez, Project Engineer Paul Jayson Duya, asin iba pang opisyal kan DPWH, siringman sinda Mark Allan Arevalo kan Wawao Builders, Ma. Roma Angeline Rimando kan St. Timothy Construction, pati na an mga opisyal asin board members kan St. Timothy, asin Sally N. Santos kan SYMS Construction Trading. Sigun sa COA, an mga nadiskubre an pwedeng magresulta sa kasong administratibo asin kriminal siring kan graft and corruption.
Parte ini kan mas mahewas na imbestigasyon sa mga flood control project kan DPWH Bulacan magpuon Hulyo 2022 hasta Mayo 2025 alinsunod sa direktiba ni Cordoba asin man sa pangapudan ni Presidente Ferdinand Marcos Jr. para sa paninimbagan sa paggamit kan pondo kan taumbayan.
