Ipigheras kan aktres na si Sylvia Sanchez an pahayag kan aki na si Quezon City 1st District Rep. Arjo Atayde katakod sa pagkakadawit sa saiya sa maanomalyang flood control projects.
Mahihiling sa instagram story kan award-winning actress asin producer an Instagram story man kan aki, na saiyang pig-reshare.
Sa isinagibong Senate Blue Ribbon Committee kan nakalihis na Lunes, Setyembre 8, saro an pangaran ni Atayde sa naunambitan kan contractor na si Curlee Discaya, na mga kongresistang soboot natawan nin komisyon sa saindang flood control projects, basado sa saindang sworn statement.
Si Curlee an agom ni Sarah Discaya na nadaog na Pasig City mayoral candidate, na mahigot na kalaban kan presenteng alkalde na si Pasig City Mayor Vico Sotto.
An nasambitan ng mag-agom na contractor an may kansaidiri kan St. Gerrard Construction Gen. Contractor & Development Corp. asin Alpha & Omega General Contractor & Development Corp.
Sa saindang pahayag, pinagaranan ni Curlee an mga politiko asin DPWH official na soboot naghahagad nin 10-25% share sa mga proyektong naganahan ninda.
Makalihis na maimbwelto an pangaran asin mag-trending sa manlaen-laen na social media platforms orog na sa X, tulos man nagluwas nin opisyal na pahayag an lehislador.
Magin an agom kaining si Maine Mendoza, nag-alma man sa isyu asin dinepensaran an saiyang mister.
Mientrastanto, mayo pang reaksiyon, kasimbagan, o pahayag si Sylvia dapit man sa hate comments na naresebir kaini sa social media huli digde, siring man an pagkalkal kan mga netizen sa video clips kan mga entrevista kaini.
