Ipinahayag kan Malacañang na dai dapat balewalaon an sinasabing koneksyon kan kompanyang konektado ki Atty. Manases “Mans” Carpio sa gobyerno kan China kun igwa nin supisyenteng ebidensya na nagsuporta digdi.
Ini an pahayag ni Palace Press Officer asin Communications Undersecretary Claire Castro matapos ipahayag ni dating Senador Antonio “Sonny” Trillanes IV an sinasabing labi P319 Milyon na financial inflows hale sa gobyerno kan China asin mga China-based corporations pasiring sa CALE88 Foods Corporation.
Segun ki Castro, pwedeng ibilang na pagtraydor sa banwaan an nasabing koneksyon kun mapapatunayan, orog na kun imbwelto an mga opisyal kan gobyerno.
Minsan siring, lininaw ni Castro na mayo pa nin ginigibong paghusga an administrasyon sa ngunyan.
Sinabi niya, dapat maaraman kan publiko an mga alegasyon kun igwa nin supisyenteng ebidensya na magpapatunay digdi.
Nag-apela man si Castro na dai pagtugutan na igwang mga opisyal na makadanyar sa interes asin soberanya kan nasyon.
