Nangapodan si Kamanggagawa Party-list Representative Elijah San Fernando ki Presidente Ferdinand R. Marcos Jr. na tawang prayoridad asin sertipikahan komo urgent an House Bill 4453.
An apelar, obhetong maparekas an pagpasar kan prosopwestong ley na ini sa Kongreso.An nasambitan ng prosopwesto na isinunad kan Liberal Party bloc, kaibahan an Akbayan Party-list asin iba pang minority lawmakers sa Kamara, an igwang obhetong isaley an pagbilog kan sarong independent commission.
An komisyong ini an itatalaga tanganing magsagibo nin masusing imbestigasyon sa mga sinasabing maanomalyang flood control project sa bilog na nasyon.
Sigun ki San Fernando, kun talagang seryoso an presenteng administrasyon sa paglaban sa korapsiyon asin sa pagsierto na marhay na pagpapautob kan mga proyekto kan gobyerno, dapat ining i-certify as urgent tanganing maparehas na mag-usad an prosopwesto asin magin ganap na ley.
Sa paagi kan pagigin urgent kaini, mas marekas ining mapapag-ulayan asin mapagdedesisyunan sa Kongreso.Maduon man na pighurot kaini na bakong bastante na igwang mga pinangararanan sana na imbwelto sa mga anomalya.
Dapat mapanimbag an mga tawong responsable sa mga katiwalian na ini. Kaipuhang mapanimbag an mga opisyal asin indibiwal na nagkasala asin nagwaldas kan kwarta kan tawo sa mga proyekto kan flood control.
An nasambitan ng komisyon na bibiluhon an pangengenotan kan limang indibidwal na mayong presenteng posisyon sa gobyerno tanganing masierto an saindng pagigin impartial asin mayong pigkikilingan sa saindang pag-iimbestigar.
Kaibahan sa mga miyembro kan komisyon an sarong retiradong justice kan Supreme Court, sarong public accountant na eksperto sa forensic accounting o auditing tanganing siyasaton an mga dokumento asin transaksiyon, sarong industry leader partikularmente an sarong engineer na igwang kinaaraman sa mga proyektong imprastraktura, sarong respetadong academician na maaram sa public finance, economics o urban and regional planning, asin sarong prominenteng representantes gikan sa private sector or civil society tanganing magkaigwa nin manlaen-laen na pananaw sa komisyon.
Igwa man sarong kaparehas na prosopwesto na naisunad sa senado na nagpapahiling nin suporta sa parehong kapulungan kan Kongreso para sa pagbilog kan sarong independent commission na mag-iimbestigar sa mga flood control projects.
