Nagtutubod si National Bureau of Investigation (NBI) Director Atty. Melvin Matibag na legal an magigin pag-aresto ki Senador Jinggoy Estrada enkaso na ikondusir iniyo sa laog mismo kan Senado.
Ini an pahayag kan pamayo kan nasambitang ahensiya mantang inaantisiparan an papaabot na arrest warrant kontra sa senador. Preparado man suboot an saindang opisina enkasong mag-abot an oras na ibaba na kan korte an kasuguan na isirbi na iniyo kay Estrada.
Segun ki Matibag, parte ini kan saiyang pagrepaso sa sitwasyon kan isisiribi na an International Criminal Court (ICC) arrest warrant kontra kay Sen. Ronald “Bato” Dela Rosa. Digdi pigtawan-doon niya na epektibo an legalidad kan saindang isasagibong operasyon nin huli ta hali man sa sarong lokal na korte an kasuguan, dai arog kan pigkukuwestyon kan kampo nin pigbibistong “fugitive senator” na suboot isyu an saiya hali sa sarong banyagang husgado.
Pigsimbag man ini kan nagkapirang eksperto sa ley na dai suboot “foreign” alagad “international” an sakop kan ICC, kaya igwa pa man nanggad ining hurisdikasyon sa kaso ni Dela Rosa partikularmente na yaon pa suboot sa Rome Statute an Pilipinas kan ikondusir an war on drugs sa irarom kan nakaaging administrasyon.
Binasehan man kan direktor an naging sitwasyon sa pag-aresto kan mga nagkapirang senador sa mismong pasilidad kan Halangkaw na Katiripunan. Marurumduman na naenot nang inaresto kan awtoridad sinda dating Senador Leila de Lima asin Antonio “Sonny” Trillanes IV sa mismong Senate premises sa ciudad nin Pasay.
Katakod kaini, pigsierto man ni Matibag na mayong espesyal na pagtrato an itatao kay Estrada sa pag-aresto kan NBI saiya.
Mientrastanto, yaon na suboot sa poder nin Sandiganbayan an pagsimbag manungod sa medikal na kahagadan nin nasambitang lehislador. Katakod ini kan sitwasyon ni estrada kun sain igwa suboot ining minamati sa saiyang tuhod asin nangangaipuhan nin knee replacement surgery.
An sitwasyon kan salud ni Estrada nagluwas makalihis mapabareta an pagtao nin arrest warrant saiya, kun sain kinaulay suboot siya ni Interior Secretary Jonvic Remulla ta nganing tawan nin opsyon na madakop o magsuko na sana sa mga otoridad oras na isyuhan siya nin nasambitang dokumento.
Sa ngonian, nakapagpiyansa an senador sa kantidad na P90,000 makalihis magsugo an ikaduwang dibisyon nin Sandiganbayan na atwan siya nin warrant kaibanan sinda dating Department of Public Works and Highways (DPWH) Secretary Manuel Bonoan asin nagkapira pang imbwelto sa anomalya nin flood control.
