Nauli sa mainit na kariribokan an sarong planong paramientras na katoninongan sa U.S. House of Representatives kan nakalihis na Miyerkules komo pagkomemorar sa pagkagadan ni Charlie Kirk, sarong bistadong conservative activist asin tagasuport ni U.S. President Donald Trump.
Marurumduang si Kirk, 31, ginadan sa sarong speaking engagement sa Orem, Utah. Dae pa sierto an motibo sa pambabadil asin mayo pang opisyal na report kun igwang naarestar ng suspek.
Mantang pigpepreparar an pagpupugay, naghagad si Rep. Lauren Boebert nin pangadyi asin sinabi na “Silent prayers get silent results.
”Nagalingawngaw man an pagtutol gikan sa sarong Democrats na kinuwestiyon kun tano bakong siring an pagbisto sa iba pang biktima nin kadahasan sa nasyon.
Nauli ini sa kururahawan asin igwang nagkurahaw pa nin “Pass a gun law” mantang nagpupukpok nin martilyo si Speaker Mike Johnson tanganing pahupaon an kariribokan.
Nagpuon an kariribokan sa pagkakaiba-iba kan mga kongresista dapit sa nangyaring insidente kun saen an nagkapirang conservatism, siring ninda Trump, Elon Musk, asin iba pang personalidad, pigbabasol an pig-aapod nindang “inflammatory rhetoric” gikan sa nagkapirang grupo.
Mantang an Democrats, kaibahan sinda Barack Obama asin Gabby Giffords, kinondenar an kadahasan alagad nangapodan nin pagkasararo asin reporma sa ley kontra sa pagmando kan paggamit nin badil.
Sigun sa datos kan Centers for Disease Control and Prevention (CDC), nag-abot na sa 46,728 an numero kan mga binawian nin buhay na igwang kinaaraman sa paggamit nin badil kan nakalihi na 2025 – ikatolong pinakahalangkaw na historya kan Amerika.
Mientrastanto, nagpatanid man an mga eksperto na pwedeng orog pang maglangkaw an tensiyo sa pulitika huli sa insidente, mantang pangapodan kan iba na dae na gibuhong sandata an trahedya tanganing palalaon an pagkakaiba-iba kan mga Amerikano.
