NAGA CITY- Nagtitinir na nasa high alert status an Regional Disaster Risk Reduction and Management Council operation center sa Rehiyong Bicol hasta sa September 22.
Ini an komo preparasyon sa anuman na emerhensiya na pwedeng magbungkaras sa pagselebrar kan Peñafrancia Festival 2025 sa siyudad nin Naga.
Sigun ki Claudio Yucot, Office of Civil Defense director kan Bicol asin RDRRMC chairperson, padagos na pigsusugo an mga ahensiya asin lokal na gobierno na mag-implementar nin mas mahigot na lakdang tanganing malikayan an mga mayor na problema sa nasambitan ng okasyon.
Apwera digde, an mga ahensiya man na mayong deployment sa Naga City an dapat naka-alerto asin preparado sa posibleng deployment kun kakaipuhanon an tabang.
Sa irarom kan red alert status, an mga ahensiya asin an disaster risk reduction and management offices kan Camarines Sur asin Naga City an padagos na naka-activate an operation center na iyo man ma-report sa RDRRMC operation center.
Padagos na pig-eenkaminar an publiko na magin alerto tanganing masierto an kasalbaduhan kan publiko.
Marurumduman, enot na digde, nag-deploy an Bicol Region Police Office nin 2,500 personnel sa Naga City tanganing magtaong asistensiya sa nasa 800 na mga personahe kan Naga City Police Station.
An Peñafrancia Festival an taon-tan pigkokomemorar komo pagtaong onra ki Our Lady of Peñafrancia, an patrona kan Bicol Region.
Kasuudma, matrayumpong naikundusir an traslacion procession na pig-atenderan kan nasa 800-K na mga deboto gikan sa manlaen-laen na lugar sa nasyon.
Sa presente, pinagpepreparan na an fluvial procession sa maabot na September 20, 2025.
