Ipinagsugo na kan National Disaster Risk Reduction and Management Council (NDRRMC) an preemptive evacuation sa mga lugar na tatamaan kan super typhoon Nando.
Sa bulletin kan PAGASA, an bagyo an nilalaomang mag-landfall sa Batanes o Babuyan Island na posibleng sa Lunes nin pagkabanggi hasta sa Martes nin pagkahapon.
Sinaysay ni Interior and Local Government Secretary asin NDRRMC Vice Chairman Jonvic Remulla na dae na dapat magsayang nin panahon an mga lokal na opisyal tangani iibakwar an mga residente sa danger zones.
Inihayag man ni Office of Civil Defense (OCD) Secretary Bernardo Rafaelito Alejandro IV na nasa red alert na an saindang tanggapan asin isinagibo na an gabos nin preparasyon sa super typhoon Nando na nilalaomang madara nin makukusog na uran asin duros sa hilagang Luzon asin mga kataraid na probinsya.
Pinagirumduman man kaini an mga residente sa mga maapektarang lugar na magin vigilante rason si super typhoon Nando an may diyametrong nasa 1.060 kilometro na makakaapektar sa Northern Luzon.
Nakabadera an Tropical Cyclone Wind Signal Number 2 sa Batanes, Cagayan kabali na an Babuyan Group of Islands siring man an hilaga asin silangang parte kan Isabela.
