Pigbubusol ni Parañaque 2nd District Rep. Brian Raymund Yamsuan an pagsumiter kan propwestong ley na matao nin multi-hazard maps para sa kada syudad asin bayan sa nasyon.
Obheto kaining makatabang sa preparasyon sa sakuna asin sa pagplano kan mga lokal na gobyerno.
Sigun ki Yamsuan, an saiyang House Bill 4035 an makakatabang sa pagpapautob kan bagong ley na Republic Act 12287 o an State of Imminent Disaster Act, na tintaan ni Presidente Ferdinand Marcos Jr. kansuarin sana.
Sa irarom kan ley na ini, puwedeng magdeklarar nin “state of imminent disaster” an gobyerno dawa antes pa man tumama an sakuna, tangani makapagpreparar tulos.
An multi-hazard maps an matukoy sa mga lugar na posibleng tamaan kan baha, landslide, pagputok kan bulkan, linog, storm surge, asin iba pa.
Gagamiton ini kan mga lokal na DRRM councils tangani maaraman kun saen dapat maglunsar nin preemptive actions.
Sa irarom kan HB 4035, inaatasan an DENR sa tabang kan NAMRIA, DOST, PhilSA, Climate Change Commission, NDRRMC, asin mga LGU tangani magbilog nin mga mapa asin siertuhong ini an updated kada tulong taon.
Kaiba man sa plano an pagtatao nin training asin impormasyon sa mga opisyal kan barangay, rescue teams, asin komunidad.
An mga hazard map an ibabali sa disaster response asin development planning kan LGUs, asin gagamiton man kan mga national agencies sa pagplano kan mga proyekto kan gobyerno.
Dugang pa ni Yamsuan, an propwesto an magpadagos sa napuonan kan Project NOAH, na nakatabang sa pagtukoy kan mga lugar na madalas tamaan kan matinding panahon.
Obheto ni Yamsuan na makalikay sa siring na kadakulang danyos sa paagi kan amay na kaaraman asin preparasyon.
