Naobserbaran an voluminous steam o mahibog na singaw sa main crater kan bulkang Taal kan nakalihis na banggi nin Biyernes, Oktubre 10 na naghaloy nin haros sarong oras.
Sigun sa Philippine Institute of Volcanology and Seismology (Phivolcs), nangyari an aktibidad kan bulkan magpuon alas-9:55 nin pagkabangi hasta sa alas-10:45 nin pagkabanggi.
Nagbuga an bulkan nin puting plume na nagpakol sa 2,100 metro an langkaw gikan sa crater, basado sa nairehistro kan Taal Volcano Observatory Thermal Camera.
Ipinaliwanag man kan ahensiya na normal na an pagbuga kan bulkan kan voluminous steam magpuon kan magsabog ini kan nakalihis na Enero 12, 2020, na nagresulta sa pagkabalot kan nagkapirang parte kan Batangas asin man karatig na mga probinsiya kan ibinuga kaining abo.
Katakod man kaini, pigtawang duon kan ahensiya na nagtitinir na epektibo an Alert Level 1 sa bulkan, na nangangahulugang nasa abnormal na kondisyon ini bagaman mayong ipinapahiling na nakaambang banta kan pagsabog.
Padagos man an pagirumdom sa publiko na bawal pa man an paglaog sa Taal Volcano Island, an permanent danger zone huli man sa posibilidad kan mga mapanganib na aktibidad kan bulkan.
