NAGA CITY- Pigsaysay kan Department of Education Camarines Sur na quarterly nagsasagibo sinda nin Earthquake drill komo preparasyon enkaso igwang magtamang linog.
Sa entrevista kan Bombo Radyo Naga ki Atty. Salvador Bogs Pelingon, Division Information Officer kan DepEd-Camarines Sur, sinaysay kaini na huli sa sunod-sunod na pagtama kan makukusog na pagyugo-yugo sa nagkapirang parte kan nasyon orog na mas kaipuhan sa presente an pagkundusir nin Earthquake drill.
Sigun sa opisyal, kaipuhan na magin parte kan routine kan mga estudyante an pag-aram kun ano an gigibuhon enkaso magkaigwa nin linog.
Dugang pa ni Pelingon, dapat aram man kan mga kaakian, mga paratukdo an gigubuhon oras na magtanog an bell para sa linog o kasulo.
Mientrastanto, pigtawan duon man kan opisyal na basado sa DepEd order pwedeng magsuspender nin klase enkaso igwang magtamang makusog na linog orog na ta pigkokonsederar ining natural calamity.
Katakod digde, saro sa mga pigkakahaditan kan saindang lado, dae masasabi kun nuarin matama o maabot an linog kun kaya dae soboot naanteseparan an mga lakdang na dapat gibuhon.
Huli kaini, kaipuhan an regular na pagsasagibo nin nga drill tanganing magkaigwa nin ideya an mga kaakian sa mga dapat gibuhon sa siring na sitwasyon tanganing malikayan an anuman na klase kan katibaadan.
Sa ngunyan, pig-asegurar na sana kan opisyal na padagos an ginigibong mga lakdang tanganing magin salbado an mga kaakian sa laog kan eskwelahan.
