Pigrekomenda ni Senator JV Ejercito na ibalyo an nagkapirang parte kan tinapyas na P250 billion flood control project funds sa mga big ticket item na para man sa pagkontra sa baha.
Sigun ki Ejercito, igwang mga darakulang flood control project na nangangaipuhan nin pondo tanganing masimbagan an problema sa pagbaha siring na sana sa Central Luzon.
Pigtukoy kan Senador an mga darakulang floodways, dams, water impounding, asin spillways na naghahalat sana nin pagkakataon na maipagibo.
Sa mga darakulang proyekto na ini hands-off o mayong pakiaram digde an mga distrito kan mga kongresista kaya dae mahahabon an pondo.
Pigtawan-duon pa ni Ejercito na dae pa man dapat pabayaan na malubog sa baha an mga namamanwaan huli sa masunod na duwa o tolong taon na mayong tinatapos na proyekto huli ta publiko man sana an masapo digde.