Aram baya nindo mga ka-bombo, sarong surat na yaon sa bote an nakua mantang nagkukundusir nin clean-up drive an sarong pamilya sa baybayon kan Australia.
An nasambitan ng surat an gikan palan sa mga soldados kan World War I na haros 109 na taon na an nakakalihis.
Sigun ki Debra Brown, mantang an saiyang pamilya naglilinig sa baybayon kan Wharton Beach kan mahanap kan saiyang aki an sarong bote na igwang laog na surat na gikan ki Malcolm Alexander Neville asin William Kirk Harley, mga soldados na nagserbe kan World War I kan taong 1916.
Sa nasambitan ng surat nakabugtak na si Neville an gikan sa Wilkawatt, South Australia kun saen nagibong kontakon ni Brown an pamilya kaini sa paagi kan Facebook.
Sigun sa makuapo ni Neville na si Herbie Neville an saiyang Lolo an binawian nin buhay kan 28-anyos pa sana ini mantang piggagampanan an saiyang trabaho sa France.
Mientrastanto, na-contact man ni Brown an pamilya ni Harley, kun saen liwat na binalikan an dae malilingawan na memorya kan saindang Lolo.
Sa ngunyan, nagtutubod an sarong coastal oceanography professor na posibleng an bote na may laog na surat an napasiring sa pampang asin natabuhan kan baybay sa laog nin haros 100 na taon.
