Nagpakol na sa ₱116 milyon an tabang na naitao kan Department of Social Welfare and Development (DSWD) sa mga residente na naapektaran kan uran asin baha huli ki Bagyong Tino.
Kabali sa mga pangenot na tabang na ini an family food packs na pigheras sa mga biktima, orog na sa mga pamilyang nag-ibakwar.
Sigun sa pinakahuring datos kan DSWD, nag-abot na sa 191,526 na kahon kan family food packs (FFPs) an naipadara komo kasimbagan sa kahurutan na tabang kan mga lokal na gobierno sa siyam na rehiyon na apektado.
Nagpadara man sinda nin 1,961 na kahon kan ready-to-eat food (RTEF) apwera pa sa mga non-food items, modular tents, asin sleeping kits.
Pigsaysay kan ahensya na pigpepreparar na an emergency cash assistance para sa mga pamilyang naapektaran kan kalamidad.
Padagos an pagtatrabaho kan DSWD huli ta labi 600,000 pamilya o duwang milyong indibidwal na an apektado kan Bagyong Tino.
Sa nasambitan numero nasa 133,000 pamilya an nagtitinir sa labi 5,000 evacuation centers.
