Pigsierto kan Philippine National Police (PNP) na preparado an bilog na hanay na matabang sa mga operasyon kan pag ibakwar asin pagsimbag sa sakuna sa posibleng panlalamasa kan Tropical Storm Fung-Wong (na pinangaranang Uwan sa Pilipinas), orog na sa mga lugar na nilalaomang maaapektaran ngunyan na semana.
Alinsunod sa direktiba ni Presidente Bongbong Marcos asin sa patnubay kan DILG, nakikipag-koordinar an PNP sa mga lokal na gobyerno asin ahensiya kan gobyerno tangani siertuhon an kasalbaduhan kan mga kahimanwa.
Ipinagsugo ni Acting PNP Chief Police Lieutenant General Jose Melencio C. Nartatez Jr. an pagbubugtak sa gabos nin yunit kan PNP sa full alert status asin an pakikipagtabangan sa mga lokal na opisyal sa pagpapautob nin preemptive asin kun kinakaipuhan, mandatory evacuations.
Sigun sa saiya, nakikipag-koordinar na an mga tauhan kan PNP sa mga LGU asin disaster response teams tangani masiguro na an mga pamilyang nag iistar sa mga delikadong lugar an maka ibakwar nin mas amay.
Matabang man an PNP sa pagmamantinir kan kaayusan, pagbabantay sa mga inportanteng pasilidad, asin pagsigurong salbado an mga agihan asin evacuation centers.
Pigtatawan pansin kan PNP an mga rehiyon sa Hilaga asin Gitnang Luzon, kun saen nilalaoman an makukusog na uran asin duros orog na ta dagusan nang naglaog sa Philippine Area of Responsibility an bagyo.
Aktibo na an mga disaster response team kan PNP sa manlaen-laeng rehiyon, asin nakapagtatag na man nin koordinasyon sa Armed Forces of the Philippines (AFP), Philippine Coast Guard (PCG), asin Bureau of Fire Protection (BFP).
An mga pangkat na ini an nakapreparar para sa mga operasyon kan pagsalbar asin pagresponde, orog na sa mga lugar na marikas bahaon o magrasay an daga.
Pig inkaminar man kan PNP an publiko na magtinir na kalmado asin sumunod sa mga abiso kan saindang lokal na gobyerno.
Pigsierto ni Nartatez na padagos an saindang pagbabantay asin pagtabang sa mga apektadong lugar tangani mamantinir an kasalbaduhan kan gabos.
Sa pagrani kan bagyo, nangapudan si Nartatez nin pagkasararo, disiplina, asin kooperasyon gikan sa publiko. An preparasyon aain pagtatarabangan kan lambang saro an susi tangani mabawasan an epekto kan kalamidad.
Pig-inkaminar pa kan PNP sa publiko na magtinir na nakaantabay sa mga opisyal na abiso kan PAGASA asin kan iba pang ahensiya kan gobyerno tangani malikayan an paglakop kan salang impormasyon
