Kinumpirmar kan US Navy na nag-abot na sa Caribbean an US Naval Strike force kaibahan an USS Gerald R ford, an pinakadakulang barkong pandigma sa bilog na kinaban.
Sa sarong statement, sinaysay kan US Navy na nalaog na kan saindang strike group kan nakalihis na Martes, Nov.11 (eastern time) an area of responsibility kan US Southern Command, na namamahala sa Latin America asin Caribbean.
Kaibahan sa strike group an labi 4,000 sailors asin dose-dosenang aircraft, kaibahan an guided-missile destroyers asin manlaen-laen na barko.
Sigun ki Pentagon spokesman Sean Parnell, papakusugon kan pwersa an kapasidad kan Amerika tanganing ma-detect, ma-monitor asin mapugolan an mga illicit actors, asin iligal na aktibidad na nakakaraor sa seguridad asin kaunlaran kam Amerika asin makakatabang man ini tanganing mapugolan an narcotics trafficking asin criminal groups sa rehiyon.
An pag-abot kan strike group, na ipinagsugo ni US President Donald Trump kan nakalihis na bulan, an sa tahaw kan nagpapadagos na kampaniya kontra sa soboot mga drug boat asin tensiyon sa tahaw kan Amerika asin Venezuela.
Naenot na man na inakusaran ni Venezuelan President Nicolas Maduro asin iba oang opisyal an Amerika nin pagiimbento nin krisis, na target na mabuwag an left-wing socialist government sa Venezuela.
Sa ngunyan, nasa 19 na pag-atake na an ipiglunsar kan Amerika kontra sa mga barkong nagdadara soboot nin mga iligal na droga na pig-agi sa Caribbean asin eastern Pacific, na naggadan sa 76 na katawo.
