Aram baya nindo mga ka-bombo, sarong high school gym teacher gikan sa Maine an piglalaoman na maipupuli an saiyang ikatolong titulo kan Guinness World Records sa paagi kan paglaog kan nasa 1,516 three-pointer shots sa basketball court.
Binisto an lalaki na si Ryan Martin, sarong physical education teacher sa Saco Middle School.
Susog sa report, pigpurbaran ni Martin na maabot an nasa 1,683 three-pointer shots sa laog nin sarong oras alagad naabot sana an nasa 1,516.
Alagad an pinaka-orihinal na obheto kan lalaki an maabot an record na 1,372 shots na matrayumpo man kaining nalampasan.
Sigun ki Martin an suporta kan saiyang kapwa paratukdo na si Nick Wilson asin kan mga estudyante nagserbeng inspirasyon kaini sa nasambitan ng pagpurbar.
Mientrastanto, napag-araman na si Martin dating college star asin nabisto sa apod na Mr. Maine Basketball kun saen dati naman nakapagpuli nin Guinness World Record sa paagi kan paglaog kan nasa 1,134 three-pointers sa laog nin sarong oras.
Apwera digde kapot man kaini an record na most free throws made in one hour na nag-abot sa 2,494.
