Numero kan nairehistrong indibidwal na naapektaran kan Bagyong Uwan, nagsakat na sa haros walong milyon

Nagpakol na sa 7,909,186 na indibidwal an naapektaran kan panlalamasa kan Super Typhoon Uwan sigun sa Department of Social Welfare and Development (DSWD).

Sa huring pigpaluwas na report kan DSWD – Disaster Management Response as of 6:00 a.m. ngunyan na aldaw, katampad ini kan labi 2.2 milyong pamilya.

An nasambitan ng numero an gikan sa 16 na rehiyon sa nasyon na piglamasa kan kalamidad.

Mientrastanto, nasa 43,088 pamilya o 150,102 indibidwal an nagtitinir pa man sa mga evacuation centers.

Mantang nasa 158,559 na katawo o 43,790 na pamilya an nasa luwas kan evacuation centers asin nagtitinir sa saindang kanya-kanyang mga kapamilya o amigo.

Katakod kaini, nasa 23,074 na mga kaharongan an naraot kan bagyo mantang 244,252 man an partially damaged.