NAGA CITY- Nairehistro an dakulang danyos sa sektor kan pagniniyog sa Bicol Region huli sa panlalamasa kan Bagyong Uwan.
Sigun ki Atty Marlon Terrado, Regional Manager kan Philippine Coconut Authority Region V, an probinsiya na nakagprehistro kan pinakadakulang danyos iyo an Catanduanes asin an Partido Area sa Camarines Sur kun saen ini an nagpakol sa kantedad na P189 million.
Alagad sa ibong kaini, pigsaysay man kan opisyal na dae man naapektaran an farm gate price kan niyog huli ta nagpapakol ini sa P13 hasta P15 kada niyog mantang an kopra nag-aabot man sa hasta 72 pesos per kilo, depende sa lokasyon.
Paliwanag pa kan opisyal, mas orog pang nagkukusog an presyo kan niyog enkaso nabawasan an suplay, kun kaya maski igwang nadanyaran asin mayo nang tsansa na makarekober nagtitinir na kadakol man an niyog sa Kabikolan.
Padagos soboot an produksyon kaini sa ngunyan orog na ta halangkaw an demand sa International Market.
Mientrastanto, tanganing matabangan an mga coconut farmer nagsasagibo nin assessment an nasambitan ng opisina asin nagtatao man nin relief goods.
Katakod pa kaini, piglalapigutan naman kan Philippine Coconut Authority Region V na maidistrebwer an mga abono, pigpreparar naman an mga pananom tanganing maribayan an mga naputol o naraot na niyog tanganing tolos na makarekober.
Apwera digde magkakaigwa man nin medical mobile health service an nasambitan ng opisina tanganing masimbagan an pangangaipuhan pansalud kan mga magniniyog.
Sa ngunyan, nag-abiso na sana si Terrado sa publiko mapasiring sinda sa probinsiya kan Catanduanes sa mga maabot na aldaw.
